محاربة الغسيل الوردي تبدأ بإحتضان المجتمع الفلسطيني لأبنائه وبناته

الغسيل الوردي – هو استغلال التسامح في قضايا المثلية الجنسية من اجل الترويج لتوجه ليبرالي والتغطية على جرائم أخرى. مثال على ذلك هي حال إسرائيل مع المثليين الفلسطينيين فهي تستغل ضائقة المثلي في المجتمع الفلسطيني لتروج ذاتها كليبرالية متحررة ومنقذة للمثلي الفلسطيني من مجتمعه متغاضية عن الجريمة الأكبر وهي جريمة النكبة والتطهير العرقي للفلسطينيين والاحتلال.

لماذا وردي - لأن اللون الوردي هو أحد رموز مجتمع الميم حيث استعمل النظام النازي المثلث الوردي المقلوب للإشارة للمثليين والمثلث الأسود المقلوب للإشارة الى المثليات وقد قام النظام النازي بالعمل على ابادتهم خلال المحرقة تماما كما حاول إبادة اليهود والغجر وأصحاب الاعاقات الجسدية.

لماذا على المجتمع الفلسطيني ان يحتضن ابناءه؟ لأنه اللي بدوش يحتضن أبنائه ما يجيب أولاد على الدنيا أحسن. ففي اللحظة اللي قررت فيها ان تنجب ولد او بنت يجب ان تأخذ بعين الاعتبار انه في احتمال اولادك يكونوا مثليين وفي احتمال تكون روحهم منفصلة عن جسدهم وان يشعروا بالغربة تجاه ذاتهم فهم متحولين. ليش؟ فش سبب. هذا امر طبيعي جدا ويحدث في كل ثقافات العالم وفي كل الأزمنة من بداية التاريخ الى اليوم. ولاء من الآف السنين المثليين ما انقرضوا ولا راح ينقرضوا وما اختفوا من العالم ولا راح يختفوا لأنه في مشكلة او مفاجئة لازم اقلك إياها، انه الأولاد المثليين بيخلقوا من أم وأب غيريين، فكل ما في ناس غيريين بتجيب أولاد على العالم فنسبة معينة من هاي الخلفة راح تكون مثلية. فكل هاي احتمالات لازم تأخذها بعين الاعتبار. وانه تجيب ولد او بنت على الدنيا فهاي مسؤولية، ولاء مش مسؤوليتك تربي "صح"، لأنه المثليين والمثليات في الهم كثير اخوة واخوات تربوا بنفس الطريقة وما طلعوا مثليين، ففش غلط بالتربية والميول الجنسية ما بتتعلق بالتربية. بس الصحة النفسية لابنك او بنتك بتتعلق بالتربية. الابن او البنت اللي اهلهم رافضينهم ورافضين يتقبلوهم بيعانوا من الرفض وليس من الميول الجنسية المختلفة. ممكن ترفض ابنك لكثير أسباب غير ميوله الجنسية، وممكن تقرر إنك تحب ابنك وتتقبله في كل الاحول وبالرغم من ميوله الجنسية. إذا لاء فأفضل كان لو ما تجيب أولاد على الدنيا. إذا جبت أولاد على الدنيا عشان تحبهم فحبهم. اما إذا جايب أولاد على الدنيا عشان ترضي المجتمع فيهم فلا فيك ولا في خلفتك، وولا فيك وولا في تربيتك، انت مش عم تربي انت عم تقمع اولادك حتى ترضي المجتمع، فاذا عشان هيك جبت أولاد – عشان تقمعهم - فأفضل لو ما جبت بس إذا بدك تحبهم وتحويهم وتدعمهم بكل الاحول فتفضل جيب أولاد.

وكل مرة بتفكر إنك "راح تعرف تربي صح" اسأل حالك قديش انت بتحب ابنك وبالمقابل قديش انت خايف من المجتمع؟ إذا انت خايف من المجتمع أكثر فما تستقوي على ابنك عشان "تربيه صح" انما قوي حالك انت حتى توقف قدام المجتمع.

وانشالله ما يلطع ابنك مثلي، يعني يا ريت فحياة الغيريين كثير اهون، بس إذا بنتك او ابنك مثليين فتذكر انه هني بأمس الحاجة الك حتى تدعمهم وتكون سند الهم بمواجهة تنمر أولاد صفهم وولاد الحارة وربما المعلمين ومراق الطريق اللي بقرر يستلبسهم او غيرهم، فاذا انت ما وقفت جنب ابنك هاي بتكون اول خيانة بحس فيها الولد، ومن هون بتبداء ضائقته، انه الناس اللي مفروض انهم اول ناس يحبوه هني اللي عم بديروا ظهرهم اله وبرفضوه. اما إذا انت كنت قوي وقررت توقف جنب ابنك فالولد راح يقدر يواجه التنمر لأنه مش راح يكون لحاله.

وإذا ابنك او بنتك لسا صغار والرسائل اللي عم تعطيهم إياها بالبيت هي رسائل رافضة وكارهة للمثليين، فالله يعينهم لإنه اسواء شي لطفل مثلي ان يربى بهيك أجواء اللي بتعلمه من هو وصغير انه يكره حاله. وطبعا ممكن يكون ابنك مثلي. ولاء تربيتك مش راح تردعه عن الموضوع بس راح تزيد من معاناته. لأنه لما يكبر ويستوعب انه مثلي، يعني بجيل سبع سنين تقريبا وأحيانا قبل، راح يستوعب انه هاد الايشي المنبوذ والمرفوض والمكروه هو هو بدون ما حتى يعمل ايشي، وعلى الاغلب راح يرفض ويكره حاله قبل ما انت تكرهه. فحب ابنك لو سمحت أكثر من خوفك من المجتمع، هاي هي مسؤوليتك تجاه اولادك وتجاه المجتمع.

34 مؤسسة وجمعية فلسطينية طلعت بصوت واحد جماعي واضح ومسؤول، انت مش لحالك وبتقدر توقف مع ابنك.  

بيان الجمعيّات الفلسطينية تجدونه هنا. 

الجمعيات الموقعة:
أذار: المنتدى المهني لمحاربة جرائم قتل النساء
أصوات- المركز النسْوي الفلسطيني للحريّات الجنسيّة والجندريّة
أرفض شعبك يحميك
اعلام: المركز العربي للحريات الاعلامية والتنمية والبحوث
الجذور الشعبيّة المقدسيّة
الزهراء للنهوض بمكانة المرأة
السوار- حركة نسوية عربية
القوس للتعددية الجنسية والجندرية في المجتمع الفلسطيني
المركز الفلسطيني للإرشاد
المنتدى الاقتصادي العربي
المنتدى العربي لجنسانية الفرد والأسرة
المركز العربي للتخطيط البديل
انجاز: المركز المهني لتطوير الحكم المحلي للسلطات المحلية العربية
جمعية الجليل-الجمعية العربية القطرية للبحوث والخدمات الصحية
جمعية الثقافة العربية
جمعية الشباب العرب- بلدنا
جمعية انتماء وعطاء
جمعية تشرين
حراك حيفا
حركة النساء الديمقراطيات
حملة- المركز العربي لتطوير الإعلام الاجتماعي
رابطة السيكولوجيين العرب
رابطة خريجي معاهد و جامعات روسيا والاتحاد السوفييتي
عدالة: المركز القانوني لحقوق الأقلية القومية في إسرائيل
كيان- تنظيم نسوي
لجنة متابعة التعليم العربي
مركز الطفولة مؤسسة حضانات الناصرة
مركز المرأة للارشاد القانوني والاجتماعي
مركز مساواة لحقوق المواطنين العرب في إسرائيل
مسار مركز للتربية
منتدى معا للنساء البدويات في النقب
نساء ضد العنف
مركز الدراسات النسوية في القدس
نعم- نساء عربيات في المركز