انا مقاطعة الماي والبطاطا وسأصوت للقائمة المشتركة



انا مقاطعة البطاطا، لانه المزارعين العرب ممنوع يزرعوا بطاطا، ما بوخدوا ترخيص من وزارة الزراعة، لانها زراعة ربحية كثير ومحتكرينها المزارعين اليهود من خلال سيطرتهم في وزارة الزراعة.
---
انا مقاطعة الماي، لانه جهاز نقل المياه القطري هو اول واكبر واهم المشاريع الصهيونية في الدولة. من خلاله تنقل الماي من طبريا الى كل انحاء الدولة وحتى النقب. لانشاءه تم مصادرة الآف الدنمات من سهل البطوف، وبدونه ما كان الدولة بتنجح او بتقدر توقف على اجريها. انا مقاطعة الماي، لانه مشروع المياه القطري بسرق مية الاردن وسوريا ولبنان وبحولها للمستوطنات وللزراعة بالنقب، بندورة شيري وغيرها اللي بتتصدر وبتنباع اصلا في الاسواق الخارجية. انا مقاطعة الماي ومشروع المياه القطري لانه بديش اكون شريكة بسرقة الماي والتجارة فيها وتسويقها على شكل خضرا وفواكه لاوروبا. انا مقاطعة الماي ومشروع المياه القطري لانه تحويل الماي من طبريا للنقب بقلل من كمية المياه الطبيعية الواصلة للبحر الميت وبقلل من كمية المياه الجوفية والعلوية في الغور وبضر بالزراعة الفلسطينية وبالفلسطينيبن وبالتواجد الفلسطيني في الغور. انا مقاطعة الماي ومشروع المياه القطري لانه بقضاءه على البحر الميت بقضي على اهم الموارد الطبيعية الفلسطينينة، بقضي على منتجع سياحي طبي، وبقضي على معلم جغرافي عالمي (اوطى نقطة تحت سطح البحر في العالم)، وبقضي على معلم تراثي ديني في الديانات التوحيدية الثلاث.
---
انا مقاطعة الماي اللي بالقناني، لانه المياه بشركة عدن هي مياه مسروقة من الجولان، ومياه شركة عين جدي جاي على حساب المياه الجوفية الفلسطينينة وبتجفف المحمية الطبيعية بعين جدي وبتأدي لانقراض الحيوانات والنباتات اللي فيها. انا مقاطعة المياه اللي بالقناني لانه استهلاكي للماي كسلعة تجارية بوسع الفجوة الاجتماعية والاقتصادية بين الفقراء والاغنياء وبضر بتمويل شبكة المياه الرسمية التي يعتمد عليها الفقراء للشرب.
---
انا مقاطعة الماي وبشرب بس بيرة طيبة، فخر الصناعة الفلسطينية، واذا بتجيبولي اياها على نص تل ابيب بكون منيح لانه هاد تواصل ودعم للمنتوج الوطني الفلسطيني ومش تطبيع ابدًا، واصلا تل ابيب هاي هي مش تل ابيب هي يافا. انا مقاطعة الماي وبتحمم بالندى وبتجفف بالياسمين.
---
انا مقاطعة الماي ومقاطعة البطاطا ومقاطعة البندورة ومقاطعة الفليفلة الحمراء والخضراء والصفراء لانها زراعة صهيونية بالغور بتسخير اطفال فلسطينيين كعمال باجر زهيد. انا مقاطعة اللحمة والدجاج والبيض واللبن والحليب لانها منتوجات لصناعة مستشرسة، وبعتمد باكلي على الصويا والتوفو لانه ماعنديش اي فكرة من وين اجو وشو المعنى السياسي والاجتماعي والثقافي والاقتصادي للتوفو والصويا.
---
انا مقاطعة كل هدول بس راح اصوت للقائمة المشتركة يمكن هالمرة حاملة معها شي تغيير.
واذا في ايشي ممكن اتندم عليه بالمستقبل هو تمييع الخطاب العلماني امام الخطاب الديني في القائمة المشتركة، واذا تم ساعتها مش راح اقاطع انما راح احط ورقة بيضاء.
---

ممكن اقاطع انتخابات الكنيست اذا كان في عنا مؤسسات سياسية مستقلة، بس ممنوع نترك فراغ سياسي، ممنوع نترك انتاج القيادات السياسية "للمشايخ" وللجمعيات الاهلية ولصناديق الممولين. انتاج القيادات السياسية لازم يتم من خلال اوسع مشاركة جماهيرية من خلال الاحزاب ومؤسسات سياسية جماهيرية تعتمد على الانتخاب مش من خلال طواقم الجمعيات ومنصات ما الها علاقة بالجماهير.

---
ملاحظة:
بما انه البعض اساء فهم المقال، فالمقال هو مقال ساخر، يسخر من تسطيح خطاب المقاطعة والتجمل به الى درجة بات يليق به مقاطعة المياه والإغتسال بالندى والتجفف بالياسيمين. فوجب التنويه.

ليست هناك تعليقات:

إرسال تعليق